Tingog asin Providencia

Sa modernong panahon ta ngonian, siisay pa saindo ang nagdadangog sa radio? Mga estacion sa AM saka FM? Ang satong mga paratanom, istoria ninda sakuya, nadangog sinda sa transistor na dara ninda sa tahaw kan uma. Tanda ko si mga naenot na model nin cellphone, keypad man o touch screen igua pa nin built-in na FM radio.

Ngonian garo nagdidikit na ang igua nin cellphone na may radio. Ang teknolohiya garo man clima, “weather weather lang” man. Nasa AI Era na kita, baad mag-abot ang panahon na mas enot na ang teknolohiya mag-decision para sa tao.

Maogma na parte kan istoria kan buhay ko ang radio, tanda ko si Lola Pining, ang lola ko sa ina mahilig magdangog sa radio. Pagkaaga bareta, pagkahapon drama asin bareta liwat, pagpatak kan diklom madalan na siya sa TV kan paborito niyang telenovela. Naapreciar ko ang bareta asin mga programa na nadadangog ko kadto, ang musika kan FM stations lalo na pag aldaw nin Domingo, mga oldies na kasabay nin siesta pakapangudto. Igua nin sarong estacion kadto na nagpapatugtog classical music aroaldaw, maski bakong Domingo o weekend, 98.3FM ang frequency.

Tano ta ang orolay ta ngonian manungod sa radio? Igua kitang sini-celebrar, ngonian na taon tolong dekada na ang DWRV 98.3FM Radio Caritas Mariae (RCM) The Mother’s Touch, ang harong kan programang Oras nin Paraoma (ONP). Ang pinagkuanan ta kang apod sa kolumn ta digdi sa Bicol Mail. Kan taon 2020, bago mag-lockdown dara kan pandemyang Covid-19, nagpoon ang ONP sa RCM.

Mawot ko magpasalamat sa RCM sa pagbukas kan saindang pinto kan programa para sa sektor kan agrikultura, sektor kan mga paraoma asin mga parasira sa laog nin halos anom na taon na. Nagkaigua kita nin programa sa RCM sa imbitasyon ni Kapanalig Beauty sa closing program nin sarong event sa sarong mall digdi sa Naga.

Ang sako man na pagpasalamat sa Bicol Mail sa espacio kan kolumn na ini. Palaog na ang kolumn sa enot na taon kaini sa periodico asin sa panahon ngonian puede nang sabihon na ang sarong taon haloy naman. A la suerte, ang sabi kayan.

Ang treintang taon nin pag-exister, halawig naman. Kabanga kang average na edad kan tao sa kinaban kan Dekada 70’ hanggang 90’. Sa buhay nin punong kahoy, one-fourth o one-tenth depende sa klase. Sisay man baya makakasabi kung hanggang saen ang ilalawig kan buhay? A la suerte.

Ang istoria kan Radio Caritas Mariae bako man a la suerte, kundi Providencia. Nagdalagan bilang non-profit radio station, bako bilang negosyo. Masasabi ta na ini ang puso nin pagserbi, na dai naghahagad asin naghahalat nin karibay. Maski limitado asin may kakulangan sa recursos, dai pinabayaan. Sa paagi kan mga pamibi, yaon ang mga taga-suporta asin padagos na donasyon kan comunidad. 30 years of grace ang sabi sa post kan RCM sa facebook page kaini. Causa ini nin pagpasalamat.

Ang tingog kan Radio Caritas Mariae sa laog nin tolong dekada, iyo ang tingog kan lambang saro na yaon sa pagtubod, na yaon sa pagdangog, na yaon sa pag-serbi, asin yaon sa misyon nin pagheras!