Tigsik

Tigsik ko ini bagang mga tunay na Kristyano,

Na nagtutubod sa Diyos na buhay asin tutuo.

Sumamba kita sa Diyos na tunay na ispiritu,

Bako gibo sa inukit na gapo, kahoy, semento.

Tigsik ko an” impeachment hearing” na ginibo,

Natapos na sa kongreso, hahatulan sa senado.

Kun bubusision an mga ebidensiyang patutuo,

Talagang delikado na an pwesto kan akusado.

Tigsik ko ining patrabaho kan Naga-Pili Airport,

Nin huli sa problema kan’ earthfill” sa paghakot.

Presyo kan kada kubiko haros dai daa maagod,

Abala na an patrabaho, deadline dai maaabot.

Tigsik ko, ibang opisyal kan lokal na gobyerno,

Na nagsasapo nin pagkasuspendi sa serbisyo.

Dahil gayod ta may pagsuhay sa ley na naginibo,

Kaya kun pirang bulan na mayu sindang sweldo.

Tigsik ko ining panahon na grabe talaga an init,

Magin marigmat sa mga de kuryenting ginagamit.

Ta kun may diperensiys na asin nag- o “overheat,”

Tibaad kasulo sa pagrurugaring iyong makakamit.