Tigsik

Tigsik ko an kadaklan na mga kahimanwa,

Sa paggibo nin kasalan magbarakli na kita.

Ta kun bawion na an sinublian na buhay ta,

Kun dai, an kalag ta mapaimpyerno talaga.

Tigsik ko kun malipot baga ining panahon,

Pwertehon sa mag-irilusyon, mag-aragom.

Orog kun an mirindala suman na managon,

O kalamay na nakakalumay na mapuluton.

Tigsik ko an sitwasyon sa ibang komunidad,

Mga kahimanwa ta dapat magin marigmat.

Mararaot na elemento kan satong sosyodad,

Sa mga panghahabon, nagbwerelta na liwat.

Tigsik ko ining isyu sa daga na pang-aanab,

Mga kahimanwa na apektado nagkakaurag.

Asin ta tarakot, dai nakakaboses nanggad,

An mga nanunungdan biyong nagkaurukag.

Tigsik ko kun an bulan na Pebrero minaabot,

Sa Aldaw nin mga Puso may nagkakasiribot .

Sa namutan may burak tanda nin pagkamuot,

Romdomon, an Diyos an namuot sato na enot.