Tigsik

Tigsik ko kan magkasala sinda Eba asin Adan,

Dinaya ni satanas sa paagi sana nin pagkakan.

Paagi nin pandaraya iyo pa sagkod sa ngunyan,

Sa mga pagkakan kitang mga tawo ginagadan.

Tigsik ko an ibang nasyon kun pagmamasdan,

Na dai nin kaumahan, kadagatan, kakahuyan.

Alagad an Pilipinas igwa kan gabos nang iyan,

Tios nin huli sa mga opisyal na may kapasluan.

Tigsik ko man ining panahon na malipot-lipot,

Kadakol nin mga gurang an nagkakamakulog.

An mga hiluluan biyo man na naghihibot-hibot,

Maduduso an mga tuhod na dai na makatindog.

Tigsik ko an mga hospital sa panahon ngunyan,

Kadakulon kan igwa nin kahilangan, kamatean.

Na an kadaklan na dahilan inumon, pagkakan,

Masisiram ngani alagad madali man makagadan.

Tigsik ko an panahon na malipot ta kun tig-uran,

Kadakol kan may abo, sipon asin iba pang hilang.

Padagos nang tatrangkasuhon kun mapapabayaan,

Kaya masakit magparayaba-yaba ta mauulakitan.