Tig-aw Festival mas bongga sa mga masunod na taon
- Aug 9, 2025
- 2 min read
Ni Sonny Malate
TIGAON, Camarines Sur --- Gigibohon na mas dakula, bibo asin makolor an celebrasyon kan Tig-aw Festival sa mga masunod na taon.
Segun ki Gerry P. Musa II, Senior Tourism Operations Officer, mawot kan bagong magtukaw na alkalde, Eugene B. Fuentebella, na orug na maibusol an turismo, cultura asin economia kan banwa sa paagi kan sarong bonggang celebrasyon kan famosong festival.
An Tig-aw Festival 2025 may temang “Progreso Padagoson, Kultura Padangaton”. Ini significanteng actividad katakod kan ika-219ng taon kan kafiestahan ni Santa Clara de Assisi, Patrona kan Parroquia, Agosto 11-12.
Pigbuyagyag ni Musa na sa maabot na mga taon, sa initiativa kan huben na alkalde, may itutugdok na mga estructura asin ilalatag na mga programa na orug na mahatak nin mga turista. Sa paagi kaini, naglalaom an hefe ehecutibo na ini maresulta sa actibo asin bibong economia kan Tigaon na ngonian saro nang 1st class municipality.
Ngonian na taon. mga significante asin makahulogan na actividades an nakalinyada magpoon Agosto 8 hasta 12. Saro digdi iyo an paglansar kan “DISKUBRE: Camp Immersion”sa comunidad kan Agta Tabangnon sa barangay Coyaoyao.
Sa mga masunod na bulan iba pang mga lugar na tagob nin istorya asin natural na kagayonan an bibisitahon kan multi-sectoral na grupong oorganizaron kan local na gobyerno tanganing diskubrehon asin maitampok para sa mga pangturismo, cultura asin economiang katoyohan.
Apwera kaini, ilalansar man an sunflower farm, magkakaiguang job fair, agri-tourism expo asin food competition, trade fair, art exhibit asin painting competition na nagtatampok sa mga pambihirang personalidad, bagay, pangyayari asin iba pa na tatak Tigaoeño.
Yaon pa man an taun-taon na pagpili kan Miss Tig-aw, patiribayan nin man-iba-ibang talento, sports competition, coastal clean up asin barayle para sa mga kamagurangan.
An lado kan Simbahan Catolica participado man sa paagi kan Bayle sa Patio kun saen tampok an “Devotional Dance” o an sayaw ki Santa Clara de Assisi, an pig-aarangan kan mag-agom tanganing biyayaan nin aki.
An Tig-aw Festival namundag sa termino pa ni dating alkalde, asin ngonian congresista, Arnie B. Fuentebella. Ini padagos sa pagiging mayor na celebrasyon na nagtatampok kan mayaman na istorya kan banwa.
An tig-aw sarong tinanom o shrub na an burak kun may kahalong ibang ingrediente gamit sa paghilo nin sira. An dahon kaini saro man na herbal medicine para sa kulog nin tulak. An tig-aw iyo an ginikanan kan pangaran kan Tigaon bilang sarong banwa na ngonian 323 na taon na.
Sa paagi kan esfuerzos kan local na gobyerno sa liderato ni Alkalde Fuentebella, suporta kan Sangguniang Bayan sa pangengenot ni Bise Alkalde Julius R. Lelis, Municipal Tourism Office, pribadong sector asin ibang stakeholders, piglalaoman na padagos an progreso asin pagrambong kan kultura kan banwa.
Viva Santa Clara! Visitahon Tigaon! An entradang dalan sa distrito kan Partido!
Comments