Tagay Na Pade

Dara kan mga pelikula ni John Wayne asin ni Lee Van Cliff na iyo ang mga cowboys na nakasakay sa kabayo asin baradilan ang ginigibo sa saindang tanang buhay. An mga pelikulang kowboys, istorya nin garadanan sa paagi nin badil asin ipinapahiling duman ang bilis kan kamot asin pagiging sharp shooter. Sa mga inuman nauuso ang mga tagay nin arak na pig titigis kan bartender. Ang sarong estranhero na nagtukaw sa bar asin nag order nin sarong tagay, iyo an parating pinag iinitan kan mga barombado sagkod na mag borontolan asin magbaradilan. Digdi sa satuyang Supermarket, iguang bar na ang gin pig tatagay na iguang bayad. Ang bar yaon sa may ibaba kan paikot na dalan. Kadakol an nag tatagay nin one shot sagkod nasinda magkamang papule . Sa perang taon na pag painom nin tagay sa supermarket, kadakol ang napahingustohan sagkod na sinda pasaro-saro nang nagpapa aram sa kinaban ta dai nakasalbar sa mga helang na dara kan isog kan Gin. An mga helang iyo ang pagkasulo asin paglukot kan katoy asin ang iba nahulog sa tesis asin helang sa bato. Nakakamundo na saro man sa miembro kan samuyang familya ang naging kowboy sa supermarket ta hapon hapon minahapit sa bar para pa tagay nin gin sagkod na abuton nin bangui kung kaya, minapuli na zigzag ang paglakaw. Dai nag haloy nagkahelang sa katoy, sagkod na nagadan sa saiyang harong sa San Roque Camaligan asin ilinubong sa sementeryo kan Marupit. Ang bar sa supermarket iyo ang paboritong tambayan kan mga parabuno nin orig, paratiendang sira, mga para baggage asin mga kargador. Saro idto sa nagtataong konsuelo sa mga taga supermartket ta bakong magastos ta puedeng mag burat sa paagi nin tagay o inaapod na one shot. Nuarin daw liwat na buhayon sa Naga ang “Tagay Na Pade” sarong bar na ang pag inom sa paagi nin sarong tagay na iguang bayad. Kung ika burat na, kakabiton ka kan amigo pasiring sa open patio kan Supermarekt ta duman ka magpahingaw asin magpahali kan kaburatan. Sa open patio kan supermarket yaon ang masisiram na pagkakan na mga sinabawan nin vaca asin damulag. Iyo idto ang pinaghahanap ngonian kan mga balikbayan ta barato na basug ka pa. Sa open patio, ang gabos nakatindog mayong tukawan pugol an mangko asin ang ang gamit stick kan barbecue mayong pinapagamit na kutsara tanganing likay sa hepataytis. Kadaklan sa mga customer, iyo idtong nagsasaraod na hale pa sa riverside asin idtong mga nagka gurutom sa laog kan sinehan ni Bichara. Ang mga luto sa open patio iyo ang sinabawan na kustilyas, arog kan paksiw, rabot asin lamang loob na dinuguan. Pati ang mga empleado nin mga banco nagdadayo sa open patio kan supermarket ta nakaka adik an siram kan paksiw, dinuguan, goto, tinumtuman asin puto Lanzon. Makasayang na bihira na ang arog kaining tagay inuman asin tirindogan na kakanan sa open patio. Maging ang mga customer kaidto kadakol na sainda ang mayo na asin ang bagong henerasyon ngonian dai na tood magkakan kan mga sinabawan sa open patio ta mas gusto ninda sa mga Mall ta iguang French fried asin burger.