SA RESOLUSYON KAN SP CSUR: Pabor sa sektor nin transportekun gugontingan an 12% VAT

Pabor sa sektor nin transporte kun gugontingan an doce por cientong Value Added Tax (VAT) sa produkto nin petrolio alagad nasa disisyon ni Presidente Ferdinand Marcos Jr. kun mangyayari.

Ini an reaksyon ni Gil Belen, presidente kan Federation of E-trike Tricycle Operator Drivers Association sa Ciudad nin Naga sa resolusyon kan Sangguniang Panlalawigan kan Camarines Sur na naghuhurot sa Congreso, Department of Finance asin Malacañang na dapat bawasan an 12% VAT na sinisingil sa produkto nin petrolio asin basic goods tanganing makatabang sa namamanuan sa tahaw kan padagos na nangyayaring inflation.

Si Vocal Donna Ann Oñate kan ika-limang distrito kan Camarines Sur iyo an padreno kan resolusyon na pinaboran kan mga miembros kan junta provincial sa ginibong sesyon regular.

Saiyang tinawan doon na dakulang bagay kun gugontingan an sinisingil na 12% VAT sa produkto nin petrolio asin iba pang mga mayor na barakalon sa tahaw kan krisis sa ngunian huli kan nangyayaring man na krisis sa Middle East.

Alagad nadidificilan an gobierno nasyonal na suspendiron an doce por cientong VAT sa mga basic goods asin petrolio huli ta dapat mag-agi pa sa lehislasyon na ciertong apektado man an pagbagsak kan koleksyon sa buwis.

An sinuspende sana ni Marcos iyo an excise tax sa liquefied petroleum gas sa paagi kan Executive Order No. 114.

Afuera kaini, igua nang enot na grupo kan GABRIELA Alliance of Filipino Women an naghuhurot sa Department of Finance na ibasura na an VAT sa lana asin iba pang mga basic commodities.

Produkto nin petrolio naghuros si presyo kan nakaaging semana alagad liwat naman nagpatong nin presyo. (BMail)