SA NAGA AIRPORT: Mamundong bareta sa pasajeros kan Cebu Pacific sa CamSur

Sarong mamundong bareta sa mga taga Camarines Sur ngunian na taon an desisyon na envez sa dating ruta sa Ninoy Aquino International Airport (NAIA) magbaba an pasajeros kan Cebu Pacific haling Naga Airport sa Pili, Camarines Sur alagad poon sa Marso 29, 2026, ililipat na sa Clark International Airport (CRK) sa Pampanga.

Sarong desbentahe sa negosyantes maging iba pang regular na pasajeros huli ta envez na deretso sa Manila an saindang ruta alagad mas malawig pa sundo sa Pampanga kun saen yaon digdi an CRK airport.

Ini an mga pahayag ni Bise Alcalde Tomas Bongalonta Jr. kan Pili, CamSur alagad segun saiya ‘‘kiisay na kasalan’’ na pigbabasol niya an Capitolio Provincial.

Haloy na an proyekto kan Department of Transportation (DOTr) kan Naga Airport Expansion na kasabay pa kan Bicol International Airport sa Daraga, Albay na ngunian perang taon nang operational. Aram na kan mga taga Camarines Sur kun siisay an dapat basulon na nagpoon an isyu sa barakalan nin daga na dapat 134 hektaryas na ginibo niyang 200 hektaryas sagcod na gustong baratong an presyo kan daga kan mga paraoma na apektado kan proyekto. Saiyang napag-araman sa Regional Development Council an fondo na cantidad P402-M hale sa DOTr yaon sa gobierno provincial. Sa lado kan provincia an pigbabasol iyo an alcalde na nakakaulang sa proyekto alagad pinahimotikan man pabor ngani siya sa ‘‘development’’ kan Kabesira kan Camarines Sur.

Kun mababa an pasajeros kan Naga Airport sa CRK, kaipuhan pang liwat na mag-viaje nin sagcod sa labing duwang oras nganing makaabot sa Manila.

An mangyayari kaini, si mga pasajeros sa Camarines Sur na mawot magbaba sa NAIA, mapasiring sa Daraga, Albay nganing sa Bicol International Airport nalang magviaje para deretso na sinda sa Manila.

Nagpaluwas naman nin advisory an Cebu Pacific nganing amay maaraman kan saindang regular na pasajeros.

An desisyon na ini susog sa resolusyon kan Department of Transportation’s Manila Slot Coordination Committee petsado Hulyo 29, 2025 na an pinal na pagdakit kan turboprop aircraft operations hale sa NAIA Terminal 2 pasiring CRK airport.

Enot kaini, an PAL o Philippine Airlines haloy nang nagdesisyon na dai na magviaje sa Naga Airport huli kan hayapit na runway asin an nawalat na sana iyo an Cebu Pacific.

Cebu Pacific.