SA LUPI, CAMARINES SUR: Reclamo vs sa padagos na pag-quarry mayong aksyon an DENR

Apektado na an mga residentes kan Barangay San Ramon, Lupi, Camarines Sur asin pagtaraid na barangay kaini sa padagos na naghihiwas na ‘‘quarry operation’’ asin mas lalong delicado sa mas halangkaw na tubig baha, alagad mayo pang aksyon sa DENR.

An Barangay Council kan barangay na pinamamayohan ni Kapitana Wilma Recierdo nag-atubang na sa press conference sa Ciudad nin Naga mantang mayo man ginigibong aksyon an gobierno lokal huli kan pigsasabing posibleng aram sa Capitolio Provincial kan Camarines Sur.

Sinabi pa na si Alcalde Christopher Jacinto envez na magcontra nag-isyu nin ‘‘certificate of no objection’’. Kan dating administrasyon ni Alcade Gagay Matamorosa mayong siring kaini an barangay.

Napag-araman kan barangay na ECC permit sana kan envuelto sa pagdestroso sa saindang kapalibotan nganing magpadagos sa ‘‘quarrying’’.

Sinabi ni Recierdo nagdulok na sinda sa Committee on Environment kan Sangguniang Bayan sa pamamayo ni Consejal Marlyn Diamante sagcod na nag-atendir sinda sa pinaapod na committee hearing mayo man aksyon envez an desisyon pinasa sa sainda na magpasar nin resolusyon na iyo na ngani an saindang ginibo alagad padagos man giraray an pag-quarry.

Mayo man aksyon an Presidente kan Liga ng mga Barangay mantang kaalyado kan Capitolio Provincial.

Apektado na an saindang tinampo na perming inaaragihan nin darakulang truck asin iba pang heavy equipment na ginagamit sa pagburongkal asin pagkakal nin daga, graba asin baybay.

An tubig na ginagamit kan mga residentes aroaldaw sa paglaba asin iba pa dai nang pakinabang huli ta malibogon na.

Nagdulok na sinda sa DENR alagad mayo man nin ginigibong aksyon sagcod sa ngunian.