SA BENTENG BIGAS, MERON NA! Kadiwa sites, LGUs, mercado publico mapabakal nang bagas

Ibabale na kan Department of Agriculture an kadiwa sites, LGUs sa pagpabakal kan baratong presyo nin bagas sa irarum, kan Benteng Bigas, Meron Na! Program ni PBBM alagad tutugotan na an mga paratienda nin bagas sa mercado na kaipuhan sanang mag-apply sa Food Terminal Inc. nganing iimplementar na kan DA an ‘‘Rice for All’’.

Sa ngunian an pagpabakal sana kan Benteng Bigas ginigibo sa sanga kan National Food Authority sa Palestina, Pili, Camarines Sur sa mga calificadong benepisyaro na dapat iguang darang ID hale sa sektor kan PWDs, senior citizens, 4Ps beneficiaries, paraoma asin iba pa.

Sinabi ni Marbin Malabanan, Assistant NFA Branch Manager kan ahencia ginatos nang mga benepisyaro an nagpipirila sa saindang provincial office sa Barangay Palestina, Pili, Camarines Sur alagad sa dai mahahaloy iluluwas na ninda sa mga LGUs, DA Kadiwa sites, asin iba pang outlet na kaipuhan mag-agi ngona sa proceso kan FTI.

Nagseguro an NFA Camarines Sur na bastante an saindang stock nin bagas sa saindang mga bodega asin sa iba pang banwaan. Sa ngunian iguang stock na 50,000 na sakong bagas asin 456,350 na sakong paroy mantang kun ipapamolino iguang maabot sa 305,077 sakong bagas.

An benteng bigas, meron na!, sarong iniciativo kan govierno na saro sa pinangako ni Presidente Marcos kan siya nagcacampanya sa eleksyon presidential asin yaon sa irarum kan DA an pagpabakal nin decalidad na bagas sa cantidad na P20 cada kilo para sa bulnerableng sektor asin paraoma sa mga NFA asin Kadiwa sites.