Rehabilitasyon kan MNSC sa Brgy Pacol, paralisado

Paralisado an rehabilitasyon kan diez hektaryang Metro Naga Sports Complex sa Barangay Pacol, Ciudad nin Naga sa tahaw kan controvercia sa ngunian sa mga proyekto sa infrastractura sa DPWH nakabale na igilid ngona an pagpadagos kan patrabaho apesar na igua nang fondo.

Si Alcalde Leni Robredo nagpahayag sa miembros kan media na nanghihinayang siya kan proyekto sa MNSC na poponan na alagad nagpaluwas nin direktiva an Department of Public Works and Highways na kabale an pagpapondo kan sinambit na proyekto sa ciudad mantang an fondo hale sa sinambit na ahencia.

An Camarines Sur 3rd Engineering District kan DPWH pigpasubasta na an proyekto alagad huli kan mga isyu sa ahencia, pinapondo ngona an pagpadagos kan rehabilitasyon.

Plano kan jefe ejecutivo na kun matapos an rehabilitasyon kan MNSC, maparticipar an ciudad sa bidding para sa Palarong Pambansa.

An MNSC nakumpleto kan administrasyon kan saiyang dipuntong esposo, dating alcalde asin DILG Secretary Jesse M. Robredo kan 1997 na iyo an panahon kan premirong Palarong Pambansa ginibo digdi. Nagkapera nang veces ginibo liwat digdi an kaparejong actividad nasyonal sagcod kan panahon ni dating Alcalde John Bongat asin mga Palarong Bicol.

Kan panahon ni dating Alcalde asin ngunian Representante Nelson Legacion planong ipaarkila sa pribadong sektor an MNSC alagad huli kan mga pagkontra kan nagkaperang sektor dai na nangyari.