Rehabilitasyon kan 29-anyos na MNSC pigpapadagos na kan DPWH

Nagpapadagos na an rehabilitasyon kan Camarines Sur 3rd Engineering District kan DPWH sa 29 anyos nang Metro Naga Sports Complex (MNSC) sa Barangay Pacol, Ciudad nin Naga matapos mapendiente an patrabajo huli kan controvercia sa flood control.

An MNSC saro sa mga mayor na proyekto ni dipuntong Alcalde asin DILG Secretary Jesse M. Robredo na nakumpleto kan 1997 na premirong ginibo digdi sa Naga an Palarong Pambansa.

Alagad sa administrasyon ngunian kan saiyang esposa, dating Bise Presidente asin ngunian Alcalde Leni G. Robredo iyo an naghingoha na mapakarhay an loma nang sports complex matapos makakua siya nin fondo sa gobierno nasyonal.

Kinumfirmar ni Robredo na nag-impormar na sa saiya an DPWH sa Baras, Canaman, Camarines Sur na pigponan na an patrabajo kasunod kan pinaluwas na ‘‘notice to proceed’’ sa Delpar Construction and Supplies, kontraktor kan proyekto.

An rehabilitasyon kan MNSC dapat naponan sa enot na mga bulan kan administrasyon ni Robredo alagad si DPWH Secretary Vince Dizon nagpaluwas nin memorandum na igilid ngona an mga iimplementar kan ahencia sa infrastraktura na nakadamay an pagpoon kan patrabajo sa MNSC.

Sinabi pa kan jefe ejecutivo kan ciudad oras na matapos an rehabilitasyon kan diez hektaryang MNSC, andam an City Hall na mag-host liwat kan Palarong Pambansa.

An sports complex nagkapera nang veces ginibo digdi an Palarong Pambansa maging Palarong Bicol sagcod sa panahon ni dating Alcalde John Bongat.

Kan nagtalikod na administrasyon dating alcalde asin ngunian Representante Nelson Legacion nakatalaan kuta nang paarkilahan sa pribadong negoyaste alagad dai nangyari kasunod kan mga pagcontra kan manlaen-laen na mga sektor sa ciudad.

Track oval kan Metro Naga Sports Complex primerong nagamit sa ginibong Palarong Pambansa 1997. (dpa)