NFA CamSur nagbabakal na nin P30 kan paroy hale sa paraoma

Sinakat na kan National Food Authority (NFA) sa P30 cada kilo an paroy na pinapabakal sa sainda kan paraoma sa Camarines Sur na rehistrado sa Registry System for Basic Sectors in Agriculture (RSBSA).

Alagad dapat malinig asin alang an binabagsak na paroy asin dai na sinda nag-aako nin dai pa inaalang mantang raot an saindang palay drying machine.

An palay procurement kan NFA yaon sa Barangay Palestina, Pili, Camarines Sur, Libmanan, Goa asin sakop pa an bodega sa Camarines Norte. Nakakatipid na an ahencia sa kuryente matapos magbugtak na nin solar-powered facilities sa saindang mga bodega.

Nagpalangkaw presyo an ahencia mantang panahon nin aranihan ngunian na bulan. Sa pribadong kumprada nagbabakal man nin P22 hasta P23 cada kilo dawa bagong ani asin dai pa inaalang.

An padagos na pagtongod nin paroy kan NFA nganing ciertohon na igua nin abundang stock nin bagas bilang food security encaso iguang calamidad sa provincia na binabakal sa sainda kan LGUs asin DSWD.

Laen pa kaini, tanganing mamantenir an programa sa ‘‘Benteng Bigas, Meron Na’’. Aroaldaw an saindang pagpabakal kan baratong presyo nin bagas sa awtorisadong sektor. Ginigibo sana an pagpabakal kan P20 cada kilo sa Palestina, Pili, Camarines Sur alagad mayo na sa ibang municipalidad.

Ginibo nang alas 6:00 nin aga hasta alas 3:00 nin hapon an pagpabakal kan baratong presyo kan bagas.

Sa mga mercado an presyo kan bagas nagcacantidad P45 hasta P55.