Miembros kan PNP pinatanidanma-envuelto sa patupada sa brgy

Nagpatanid an PNP Provincial Office (PPO) kan Camarines Sur sa mga miembros kan PNP na estrictong pinapangalad sa sainda an ma-envuelto sa tupada mantang panahon nin barangay fiesta ngunian na Mayo 2026.

Maging sa mga bulangan, ini an patanid kan PPO sa pamamayo ni Provincial Director Virgilio Olalia Jr. sa paagi kan saindang opisyal na parataram Lt. Col. Josefa Sylvia Sape.

Sinabi kaini, sa miembros kan media na maatubang sa caso administrativo an arin man na awtoridad na magiging envuelto sa mga patupada sa barangay.

Alagad sinabi pa na an tupada sarong ilegal mantang dai man pwedeng tugotan kan LGU o tawan nin permit huli ta pinapangalad.

Ngunian na bulan nin Mayo 2026 iguang ibang opisyales de barangay an tinutugotan an patupada nganing magkaiguang fondo asin gagamiton sa kafiestahan kan barangay alagad an bagay na ini, ilegal sabi pa ni Sape.

Dawa mayong directiva an PPO alagad an mga Municipal Police Station dapat mag-monitor sa mga tupada asin arestaron an envuelto sa ilegal na actividad.

Mientras tanto saro sa prayoridad kan PPO iyo an paglaban sa mga envuelto sa droga maging sa miembros kan PNP kaya ngani nagkakaigua sinda nin surprisang drug test.

An mga MPS padagos an saindang campanya laban sa ilegal na droga mala ngani sa mga report sa PPO hale sa police blotter haros perming iguang natatalikop na dagos nang sinasangatan nin caso sa pagbalga sa Acta Republica 9165 o Comprehensive Dangerous Drugs Act of 2002.