Mga de calibreng armas nakumfiscar sa CamSur

Nakumfiscar kan grupo nin mga awtoridad an mga decalibreng armas asin bala asin magazine sa magkasuhay na operasyon sa Libmanan asin San Fernando, parehong digdi sa Camarines Sur kan Febrero 5, 2026.

Sa Libmanan, Camarines Sur sa ginibong operasyon kan Criminal Investigation and Detection (CIDG) sa paagi kan saindang Oplan Paglalansag Omega kaibanan an iba pang grupo nin mga awtoridad sa Barangay Camambugan, sa banwaan na ini, sarong dating security guard an inarestar matapos makumfiscar sa saiya an mga armas na kinababalihan nin calibre 45 pistola, calibre 22 rifle mga bala, mga magazine nin M-16 armalite alagad ini-imbestigaran kan awtoridad kun haen mismo an M-16.

Pigbuyagyag ni CIDG Bicol Regional Chief Police Col. Oscar Regala an sinambit na operasyon kasunod kan mga reclamo nin residentes sa barangay, na nagkapera nang veces nagparapaputok kan saiyang armas mientras na nasa influhencia nin agua nin pataranta na natatakot an residentes. Pasalamat an awtoridad sa cooperasyon nin mga residentes nganing madakop an pasaway na dating guardia.

Sa San Fernando Municipal Police Station, sinabi ni Acting Chief of Police PCapt Israel Banaag sa saindang operasyon kaibanan an Philippine Army, Police Intelligence Unit kan CSPPO, asin Regional Mobile Force Battalion 5, saindang pig-implementar an search warrant contra sa suspek na nginaran na Michael nganing kumfiscaron an mga de calibreng armas na kinababalihan nin mga badil asin sa sarong lalaki na dai na nginaranan kasunod kan pigserbing mandamiento de aresto kan Regional Intelligence Unit Tracker Team asin kan San Fernando MPS sa sarong caretaker nin omahan sa Zona 7, Lupi kan banwaan nin San Fernando.

An mga suspek nag-aatubang na nin caso sa pagbalga kan Acta Republica 10591 o mas midbid sa Comprehensive Firearms and Ammunition Act.