Medalya ng Pagkilala naguno kan 2 miembros kan San Jose MPS

SAN JOSE, Camarines Sur --- Dakulang onra an nakua kan San Jose Municipal Police Station (MPS) huli sa nagunong Medalya ng Pagkilala gikan sa PNP Regional Office 5 para sa mismong hefe asin sarong personahe digdi.

An Medalya ng Pagkilala saro sa sampolong awards sa irarom kan PNP Awards and Incentive System na pigduduhol sa mga pulis na nakaginibo nin pambihirang calidad nin propesyonalismo, dedikasyon asin malasakit sa kapakanan kan comunidad.

Sa kadakol na veces ini pigtatao sa  miembros kan PNP na may kurahe, pambihirang acomplisemento asin heroismo katakod sa paggibo kan saindang sinumpaan na katungdan.

Sa awarding ceremony kan Enero 5 sa PNP Regional Office 5, ciudad nin Legaspi, naging recipiente kan Medalya ng Pagkilala sinda PCapt Niño T. Luzon, hefe kan San Jose MPS asin PCpl Jomar V. Dizon.

An award bilang pagreconusir kan saindang  ginibong pagsalbar sa sarong malalamoson na siete años na aki sa dagat kan barangay Sabang durante sa maritime procession para ki Ina kan Septiembre 13, nagtalikod na taon.

Huli sa listong pag-agap kan duwang PNP personnel, marikas na naihawas sa tubig an aki, isinakay sa PNP Patrol car pasiring sa San Jose District Hospital asin naisalbar an buhay.

Kan Enero 10 man,  sarong  amang 51 años asin 13ng taon kaining  aki an napadpad sa parteng tahaw kan dagat sa barangay Dolo. Sa marikas na pagresponde ninda PCpl Mark Anthony A. Palaypayon asin Patrolman Roland B. Rellora Jr., sinda naigilid asin nailikay sa peligro na posibleng nagresulta sa kagadanan. 

Segun ki Luzon dae niya aram  kun an duwang pulis makakaguno man  nin award huli sa naginibohan ninda. Pigtawan niyang doon na mas iniisip ninda an saindang mandato na mas orug pa sa pagmantenir kan paz y orden.

Mientrastanto, sinabi ni Luzon na an saindang oficina nagmamaigot na maging totalmente nang drug free asin drug cleared an banwaan kan San Jose. 

Sa presente, igua na sanang pitong barangay digdi an dae pa declarado sa arog kaining estado.

Dinagdag pa kan hefe na an San Jose MPS sustenido sa pakikipagtabangan sa local na gobyerno sa liderato ni Alkalde Jerold B. Peña sa pagmantenir kan katuninongan kan banwa na sarong orgulyo kan mga namamanwaan digdi.

Pigbanggit ni Luzon na si Peña bilog an suporta sainda, pruweba kaini sinda tinaohan nin Patrol Car asin tolong patrol motorcycle. Ini an nagagamit ninda sa pagpatrolya asin dakol pang trabaho kan saindang oficina. 

An hepatura padagos sa esfuerzos kaini katakod sa campanya kontra sa illegal gambling, illegal drugs, road safety asin iba pang initiativa sa pagkakaigua nin katrangkilohan sa comunidad. 

Nangapodan si Luzon sa mga namamanwaan na pirming  pangatamanan an saindang mga pagrorogaring, maging marigmat sa hirohiro kan mararaot na elemento sa sociodad asin ini  ipaabot sa autoridad para sa maninigong asistencia.

Gilid kan dagat kun saen nagresponde an personahes kan San Jose MPS. (Photo San Jose MPS)