Maghapot kita ki Father

Dear Father Bill,

Ano ta piggigiromdom an Episcopal Coronation ni Nuestra Señora del Pronto Socorro kada Mayo 6? Ano po an pwedeng gibohon?

An minagalang, Melchor

Dear Melchor,

An "Episcopal Coronation" nangangahulugan na an imagen kan Virgen nag-ako nin korona sa paagi kan otoridad kan obispo. Minimidbid kaini an sarong bantog, namomotan, asin milagrosong debosyon.

Para sa ikatolong aniversario, pwedeng paghorop-horopan an tolong bagay: Paggiromdom, Pag-ogma asin Pagpanibago. Enot, an paggiromdom. Táno ta "Pronto Socorro" -- makaskas na tabang? Dai nahuhuri o naaabala an tabang ni Maria sa mga aki nyang nag-aagrangay. Sa Kasal sa Cana (Juan 2:1-11) aram tolos ni Maria an saindang pangangaipo bago pa sinda magsabi. Sinabihan niya si Jesus: "Mayo na sindang arak." Naggibo kan saiyang enot na milagro si Jesus -- ginibo niyang arak an tubig. Iyan an Pronto Socorro. Si Santa Maria iyo an nagtatabang sa tahaw nin mga calamidad, trahedya, helang, asin manlaen-laen na problema. Dai pinapabayaan ni Maria an saiyang mga aki. An korona bakong alahas para ki Maria. Ini an satong pagpahayag na siya an reyna asin kita an saiyang banwaan. Ilinaag kan obispo an korona sa ngaran kan mga tawo sa Buhi. Inaapod ta siya "Reina del Pueblo Buhi."

Ikaduwa, an pag-ogma. Ano an kahulugan kan korona para sato ngonyan? An Reyna na may korona nangangahulugan na kita sarong pamilya nin reyna. Isabuhay ta ini na pano nin paggalang asin responsabilidad. An pagka-reyna ni Maria sarong paglingkod. "Ako sarong sorogoon nin Kagurangnan" (Lukas 1:38). An saiyang korona nag-abot pakatapos kan saiyang pag-otob kan kabotan nin Dios. Kun siya an satong Reyna, ipinapahayag ta man an satong pag-otob sa kabotan nin Dios. An pagkamoot ta ki Maria bako sanang sa pagprusisyon, mga burak, asin mga kandila. Kita man dalat daing ontok na nagtatabang sa kapwa.

Ikatolo, an pagpanibago (renewal). Paano ta isasabuhay an mga masunod na taon nin aniversario? Ano an mga halimbawa ni Pronto Socorro. Makanood kitang magtabang dawa dai sinasabihan. Mahiling ta tolos an pangangaipo nin iba asin magtabang nin makaskas. Magbisita sa may helang. Magpatawad sa kapwa sa dakulang kapakumbabaan; akoon an kapwa bilang kapamilya -- bakong kalaban; o bagohon an madatang ugali. Sa mga arog kaining konkretong mga gibo tinatawan ta nin onra si Maria. Madali si Ina magtabang, dapat kita man.

Pinagkoronahan ta siya tolong-taon na ang nakaagi. Ngonyan, itao ta saiya an satong mga puso. Viva la Virgen! Viva Nuestra Señora del Pronto Socorro de Buhi!”

An minagalang, Fr. Bill

* * *

Email me at: billparisadmu@gmail.com