Magayon An Saysay Bikol

Magayon ang ginigibo kan Saysay Bikol na nagiging Famoso ngonian sa facebook ta saiyang pinag sasaysay ang agi agi nin buhay nin sarong bikolano na nagka igua nin pangaran sa linya nin musika, edukasyon, arte , cultura asin iba pa. Minsan inapodan ako ni Mr. Victor Dennis Tino Nierva na iyo ang saro sa nagsusurat kan Saysay Bicol ta pig hapot ako kan middle name ni Salvador M. Royales, bistadong radio drama artist asin binisto sa interong pilipinas bilang parasurat asin director nin mga pinoy drama na nadadangog sa mga sikat na radyo sa Manila arog kan DZRH. Inot palan kaming nagka bistohan ni Victgor Nieva, kan ako saiyang imbitaran magtaram sa sarong pagtiripon sa Atneo. Saro sa pig publikar sa FB kan Saysay Bicol iyo an talambuhay asin mga naginibohan sa linya nin edukasyon ni Socorro Federis Tate na bisto sa bikol bilang Coring. Sigun sa mga nakabasa sa Saysay Bicol asin sa Story Telling Bicol na yaon sa FB, Si Coring Tate, ina ni Howard Tate, saro palan sa awtoridad sa linya nin English Literature ta siya nakapag surat nin dakul na libro asin mga English Short Stories na base sa mga tunay na pangyayari sa kabikolan. Si Coring, naging paratukdo sa lenguahing English asin literature sa Ateneo de Naga, Holy Rosary Minor Seminary asin sa kolehiyo duman sa Ciudad nin Iriga. Saro pa sa pinaluwas na istorya kan Sausau Bikol iyo ang manonongod sa mga naginigibohan ni depunto Jess Bolante, sarong matibay na radio announcer kan panahon ninda Eddie Alanis kan dekada 60 asin 70. Saro si depuntong Jess Bolante sa taga radyo na nabuhay nin halawig asin nagkontribuer pa bilang actor sa mga short films manonongod sa kabikolan. Sa istorya ni Announcer Jun Lasgrimas na nakabase na sa Southern California alagad iguang residencia sa Sto. Domingo Nabua, iyo na si Jess Bolante nabisto sa linya nin musika ta magayon siyang magpatugtog na tunay na nagtataong kaalingan sa mga yaon sa harong. Manonongod naman ki Salvador “Badong” Royales, pig suhestion ko ki Mr. Nieva kan Saysay Bicol na makihumapot siya sa DZRH ta naging director kan Drama Deparment si Badong kan siya nabubuhay pa. An solamenteng maiaambag ko sa Saysay Biciol iyo ang kontribusyon ni Badong Royales sa mga paradangog nin radyo sa Naga City kan mga dekada 70 asin 80 . Si Badong Royales sarong matibay na radio announcer asin dramatista ninhuli ta sa saiyang programa sa pagka bangui, natatawanan niya nin buhay an mga pinapadarang surat nin pagka moot kan mga tawong ang kadaklan yaon sa harayong lugar nin kabukiran asin solamente ang pag dangog sa radyo an saindang kaogmahan. Apuera sa malomhok niyang boses na bagay sa oras nin bangui, magayon pa siyang magpatugtog nin mga musika nin pagkamoot. Dara kan saiyang kasikatan sa Naga, na pirate si Badong pasiring duman sa DZRH sagkod na siya ang naging director kan mga drama na interong pig dadangog sa interong nasyon. An samuyang ultimong pag ulay-ulay nangyari sa gilid kan tinampo sa tongod kan City Hall mga sampulong taon na ang nakalipas. Dai ko na siya bisto sa lalawgon alagad nagpabisto siya Sakuya ta ako bistado niya dahil ako ang saro sa Emcee sa sarong media reunion sa tongod kan City Hall na ang nag sponsor iyo si dating Congressman Sal Fortuno. Sa pag olay olay mi ni Badong Royales, nahiling ko saiya ang pagiging humilde sa ibong kan pagigi niyang sika sa radyo. Saro idto sa dakulang kamunduan sa broadcast media sa Naga kan mabaretaan na nagtalikod na sa kinaban si Salvador M. Royales, ang hade kan filipino drama na nagpoon kan saiyang abilidad digdi sa Ciudad nin Naga.