LTO Partido estricto nang mabawal sa national road sa Electric Vehicles

Ni Sonny Malate

TIGAON, Camarines Sur --- Nagpagiromdom  si Gerry L. Navarez, Supervising Transportation Officer (SUTRO) kan Partido Land Transportation Office (LTO), Tigaon, Camarines Sur, na bawal na an mga e-trike asin e-bike sa mga national highway magpoon pa kan Enero 1 ngonian na taon.

Segun ki Navarez, an saindang ahencia nagpaluwas na nin directiba dapit sa pag-aprehendir, pagpataw nin multa asin pag-impound kan vehiculo sa mga masinutil sa pagcomple sa kahurotan kan saindang oficina.

Ipinahayag ni Navarez na an LTO nagdesiminar na kan pagpangalad na ini sa national TV, broadcast media asin ibang sistema nin comunicasyon kan mga nakaaging bulan asin ini higot  nindang ipapautob mantang ini implementado na.

An e-trike asin e-bike baratong alternatibong sistema nin transportation asin  environment-friendly. Sa presente, dakol na an nagpapadalagan  kaini sa mga kalye, maging pangpersonal o pangkayod, sa Bicol asin bilog na nacion.

Sa tahaw kan situacion na ini, naobservaran ni Navarez na an mga electric vehicles parating nagiging causa kan pagkaabala sa trapiko asin  aksidente orug pa kun yaon sinda sa fast lane, envez sa pinakatoong parte kan kalye sa caso kan mga 4-lane na  tinampo.

An mga e-trike asin e-bike an kinakaipohan na iparehistro sa LTO. Siring man, an drayber kaini an  obligadong magkaiguang driver's license.

Susog sa directiba, digdi sa Bicol an personahes kan LTO sa oficina regional sa ciudad nin Legaspi asin mga district office kaini  an designadong mag-aprehendir kan mga nagbalgang kagsadiri kaini.

Sa presente, an LTO mayong mga deputized PNP personnel huli sa policiang pig-adaptar na ontokon muna an arog kaining sistema. Huli kaini, dagdag na trabaho ini sa lado kan personahes kan LTO. 

Segun ki Navarez, an mga local government unit (LGU) iyo na man an  may poder na mag regulate kan ruta kan mga electric vehicle sa saindang lugar. Ini sa pagpagamit kan mga secondary roads sa banwa kun saen iguang designadong speed limit. 

Mientrastanto, pigbuyagyag kan SUTRO na an LTO Pertido District Office iyo an ginibong pilot testing area kan bagong Land Transportation Management System (LTMS) gikan sa dating LTO IT system ninda. Katoyohan kan bagong sistema iyo an maparikas, mapagean asin maging conveniente an mga transaction digdi.

Nanotaran ni Navarez na dae malikayan na an transition sa sarong  bagong sistema  minsan minacausa nin pagkaabala sa transaction sa oficina. Sa huri, ini nagiging madalahay na asin minaresulta sa marhay na servicio publico. 

Nangapodan an pamayo kan district office sa mga drayber na manteniron an respeto, maging disiplinado asin malipot an payo sa gabos na oras. Nagpagiromdom siya na magbalon nin dakol na pasencia sa kada pagbiyahe.

Dagdag niya,  dapat magtagama nin bastanteng oras sa pagbiyahe tanganing dae maging apritado, dae mag-init an payo asin makaencuentro nin kaiwal o aksidente sa tinampo.

E-vehicles padagos nagdadalagan sa national highway. (Photo PNA)