LTO Partido district office may bagong pamayo

Ni Sonny Malate

Tigaon, Camarines Sur --- Igua nang bagong pamayo an Land Transportation Office (LTO) Partido District Office digdi. Designadong Supervising Transportation Regulation Officer (SUTRO) ngonian iyo si Gerry L. Navarez, karibay ni Vanessa Chandra S. Merilles na nasa ibang destino na.

Sa pag-asumir sa puwesto kan bagong hepe kan LTO, ipinadagos niya an pagpahirahay kan edificiong namumugtakan kan oficina kaini. Ini an luma nang municipal government building kan banwaan kan Tigaon  kaya nangangaipo na nin renovation.

Particular na pinakarhay iyo an nagtuturo nang bubong, raot na mga bintana asin turukal na tiles. Pigsalugar man an mga kagamitan asin equipajes asin nagkaiguang panibagong pintura kaya naging maaliwalas an hitsura kaini.

Pig-asikaso man an inventaryo kan mga naimpound na vehiculo sa paagi nin pagkaigua nin control number kada unit kaini.  Sa presente, intero nang surosoan an dakol na sakayan sa limitadong espasyo sa gilid kan edificio.

Segun ki Navarez, an mga naimpound na vehiculo makakabuwelta sa kagsadiri kaini oras na macomple na ninda  an maninigong  multa  asin documento  kaini.

Susog pa ki Navarez, santaon nang pig-ontok muna an pagdeputize kan miembros kan Philippine National Police (PNP) sa mga local na LTO district office  en vez  ini pigbalyo sa oficina central ninda.

Ini nagcausa nin dagdag trabaho sa saindang  personahes,  naging dalan sa paglangkaba kan mga pagbalga sa tamang pasistema sa pagcomple sa regulaciones kan LTO asin nagresulta sa pagbaba kan revenue generation kan ahencia.

Sa presente, an mga operasyon sa tinampo sa distrito kan Partido ginigibo kan mga personahes gikan sa oficina regional kan LTO sa ciudad nin Legaspi.

Mientrastanto, pigpagiromdom ni  Navarez an mga motorista na dae magdulok sa mga fixer orug na sa pagkua nin driver's license asin  pagparehistro nin vehiculo.

Piglinaw niya na an transaction sa  district office dapit digdi an marikas na napoproceso kan personahes  ninda kun an papeles kan sarong motorista completo asin tama.

Dinagdag pa kan pamayo na durante sa pagbakal nin vehiculo kan sarong motorista sa dealer igua nang plate number na pig-alocar  an LTO para digdi asin mayong rason na maatraso an pag release kaini pasiring sa motorista.

Manonotaran na an kawaran nin plaka kan motor vehicle saro sa nagiging isyu asin problema durante sa mga operasyon na ginigibo kan LTO sa mga banwa digdi sa Partido Area asin maging sa ibang localidad.

Pigtawan doon ni Navarez na makipaghilingan sa oficina ninda an mga motorista na iguang arog kaining  situacion tanganing maasistehan kan personahes ninda.

Mantang bago pa lang siyang mag-asumir bilang pamayo kan district office asin patapos na an taon, pighihiling ni Navarez na sa maabot na mga bulan  maeevaluar niya na an mga maninigong pangangaipo asin pasistema sa district office.

Ini sa lado nin staff complement,  gamit asin equipajes asin maninigong pasistema sa  pangkagabsan na operasyon  bilang sarong district office.

LTO Partido District Office sa banwaan nin Tigaon, Camarines Sur. (Photo - BM)