Love is Patient, Love is Kind

“May kasal! May kasal!”

IYO INI an pirming reaksyon kan sakuyang agom kun nakaka hiling nin ikakasal. Nauugma siya. Kun nag mamaneho ako, pinapa pundo niya nguna ako nganing ma tanaw mi an kinakasal. Kun nag lalakaw-lakaw man kami, na pundo nguna kami nganing mahiling mi an ikakasal.

KAN MGA tolong bulan na naka agi ginibong ninang si Delia (agom ko) kan aki kan saro niyang dating katrabaho. Kinasal ini sa sarong sadit na protestanteng kapilya sa Queens, NY.

Simpli lang asin magayunun si seremonyas. Kan nadangog ko si pag sabing “I do” kan si lalaking ikakasal, nagirumduman ko man si pag “I do” ko kan kinasal kami ni Delia. Medyo nagin emosyonal ako asin sabay napa ngirit ta garo sagkod ngunian “I do” pa ako nin “I do” sa agom ko.

Pero maski arog ako kaini, dara pirmi sa pagka moot an pag “I do” ko saiya. Kun presente an pagka moot, areglado pirmi an gabos. Iyo ini an sabi ni San Pablo manungod sa pagka moot. Pirmi ka nasa tamang direksyon kayan. Kaya areglado sakuya pirmi an pag “I do”.

An matrimonia o kasal saro sa mga banal na sakramento kan simbahan. An pag pamilya sarong bendisyon nganing magka igwa kita nin makusog na fundasion sa satuyang sosiedad.

Sa maabot na Enero 24 ikakasal si aki kan tugang kong si Max. Martin an pangaran kan sobrino ko asin Lucky an gaha niya.

An kasal ni Lucky gigibohon sa Manila Cathedral ta an nobya niya taga Manila. Maswerteng marhay si Max kan nakaulay niya si namumutan tang Arsobispo Alarcon kan Nueva Caceres. Na tiempohan na nasa Manila si Arsobispo Alarcon sa mga aldaw na ikakasal si Lucky. Haloy nang haraning amigo ni Max si Arsobispo kaya hinagad niya na si Arsobispo an mag kasal ki Lucky. Nag tugot man tulos si Arsobispo ta nasa Manila siya sa mga oras na iyan.

Dakulang honor sakuya asin sa pamilya mi na si Arsobispo Alarcon kan Nueva Caceres an ma kasal kay Lucky.

“Lucky talaga ining si Lucky”.

Sarong padangat na sobrino ko si Lucky. Pero dae na ako ma tao nin mga hatol o advice kay Lucky manungod sa buhay may agom. Siguro sa mga oras na ining harani na an kasal niya mabubungog na siya sa kadadangog nin mga advise. Sinabi ko lang saiya na mag pamilya siya tulos asin magka igwa nin dakul na aki. Natubod ako na importante sa buhay an magka pamilya. Iyo man ini an advise o hatol ko sa mga jovenes ngunian. Mag pa kasal na kamo asin mag pamilya. Magayon an magka pamilya. Dae kamo ma basol kayan.

Kan huri ming ulay-ulay ni Lucky nag sabi lang ako saiya na maski matapos na an honeymoon kaipuhan dae matapos an pagka moot. Kaipuhan mag damayan asin mag pasensyahan an mag agom maski anong panahon sa gabos bagay.

An sarong ehemplo kayan arog kaini:

Mahilig si Lucky mag luto asin mag bake. Halimbawa niako kaipuhan ni Lucky nin tabang kan agom niya sa kusina asin an simbag kan agom niya “sandali lang Honey”, kaipuhan maintidihan ni Lucky an simbag na ini.

An gustong sabihon kan “sandali lang Honey”, tatapusun nguna kan agom niya an Korean Telerserye niyang dinadalan bago siya matabangan sa kusina.

Pwedeng nag susuba lang ako digdi sa mga sinasabi ko pero an mensahe ko ki Lucky naka surat sa Biblia:

“Love is patient, Love is kind.” 1Corinthians 13:4

An pangadye ko ki Lucky - Magka igwa kamo nin maogmang buhay asin mag sarig pirmi kamo sa Dios!”

Kun presente pirmi an pagka moot, areglado asin matuninong an gabos.