GIROK TIGSIK - 5
- Dec 30, 2025
- 1 min read
Tigsik ko an halas bagong hiluno
Maisogon pirming tungkag an payo
Dae ka magrani orug kun udto
An kamandag marara an benino!
Tigsik ko an bading sobrang gatol
An bawal iyong gustong gibohon
Inulas kan baston malaniton
Num, an bool nagtutuontoon!
Tigsik ko an kulasising berde
Nagtugdon sa sanga kan pili
Linastiko kan pilyo kong padi
Naratdag sa kale tuwad pati!
Tigsik ko an salampating guminaro
Matinubod sa among na Kano
Kada sugo, opo sanang opo
Sigeng tangho, naghuhurohuro!
Tigsik ko po ining pobreng buhay
Hakay sanang hakay, pigpupurisaw
Huli ta bitin an pamanggihan
Sa katre daeng ontok an alimpasay!
Tigsik ko an hacienderong si Don Jarsabal
Pig-aaragawan po kan daragang gurang
Mayong kapareho an pigtatagong yaman
An puro kan baston may diamanteng tapal!
Comments