Fondo sa flood control sa Naga cancelado

Ni Paulo DS. Papa

Dismayado si Punong Barangay Ruben Limbo sa pagkawara kan fondong pigtagama kuta na kan gobierno nasyonal para sa flood control projects sa Kilometer 8 asin Green Valley Subdivision sa Pacol, ciudad nin Naga.

Matatandaan, igwa nin pugol an Department of Public Works and Highways (DPWH) nin P230 milyones na fondo para sa pagsikad kan mga nasambit na proyekto sa lugar kan nakaaging taon alagad dae na naipaluwas sa barangay government huli sa isyu sa flood control projects sa nasyon.

Segun ki Limbo, nawara na lamang an fondo para sa proyekto ngonian na 2026 susug na man sa pigbareta saiya ninda Alkalde Leni Robredo asin 3rd District Cong. Nelson Legacion.

An fondo kinababalehan kan P110 million sa subdibisyon asin P120 million para sa Kilometer 8 kun haen haros kakanon na kan sulong an mga kaharongan sa gilid kan pampang.

Dugang pa kan kapitan, magibo na sana an saiyang konseho nin resolusyon, kun kinakaipuhan, sa paglaom na mabawi an budget para sa nasambit na proyekto.

Sa presente, igwa nin pighahaman na infra project sa kataid mismo kan barangay hall, Iyo an multi-purpose hall na nagkakantidad pokumas o menos P60 milyones.

Paliwanag ni Limbo, an pighahaman na proyekto naisairarom na sa bidding bago pa magputok an nasambit na isyu.