DepEd liwat nangapudan sa mgaestudiantes sa ‘‘early registration’’

An Department of Education (DepEd) sa Bicol nagpagirumdum liwat sa mga estudiantes na aprubetsaran an Early Registration sa mga malaog sa kindergarten, Grade 1, Grade 7, asin Grade 11 sa gabos na escuelas publica para sa masunod na school year 2026-2027.

An amay na nagpalista segun sa opisina ni Regional Director Gilbert Sadsad nagsikad kan Enero 31 asin matapos an registration period sa Febrero 27, 2027.

Katuyohan kan ahencia nganing amay madeterminaran an numero nin mga estudiantes na piglalaoman malaog sa masunod na school year nganing maandaman kun kaipuhan an dugang na mga classrooms asin iba pang kagamitan sa mga escuelahan.

An DepEd iyo an may pinakalangkaw na prosupuesto sa national budget na nagcacantidad nin P1.05 trillion na dakulang bagay sa pangangaipo sa haros taon-taon nagkukulang an mga classrooms maging kan mga paratukdo.

Sa padagos na paglangkaw kan numero nin mga estudiantes sa elementarya asin sa segundarya may mga escuelahan sa public schools nagkukulang an classrooms. Huli kaini, an early registration saro sa aksyon kan DepEd nganing makaandam kun pera an kaipuhan na dugang na classrooms, mga tukawan asin iba pang kaipuhan sa escuelahan kan mga estudiantes asin paratukdo.