CENRO hirit sa campanya contra illegal logging

Ni Sonny Malate

GOA, Camarines Sur --- Pigpahayag ni Cesar Basil S. Camba, pamayo kan Community Environment and Natural Resources Office (CENRO) na pursigido an oficina ninda sa campanya contra sa illegal na pagpalod nin kakahoyan sa 14 banwaan na nasasakopan ninda.

Segun ki Camba, an saindang pagmaigot sa trabaho  pinahiwas sa paagi kan pag-edukar sa publico kan tamang pag-ataman kan kapalibotan asin an maraot na epekto kan pag-abuso sa recursos naturales.

Katakod kaini, padagos an saindang pagconducir nin  serye nin kaaraman publico tanganing mabago an saindang  pananaw asin virtud dapit sa naturalesa bilang mahalagang regalo gikan sa Kaglalang para masusteniran an buhay sa kinaban sa tahaw kan huma kan global warming.

Kasabay kan advocaciang ini iyo an padagos na presencia kan siyam na mga Forest Ranger asin Forest Protection Officer sa mga designadong lugar  tanganing matabgawan an raot na gibo kan mga illegalista. Ini ginigibo sa irarom kan Lawin Patrolling sa hurisdiksyon kan oficina.

Sa paagi kan regular na monitoring, nagkakaigua nin pag-aprehendir, pagconfiscar asin pagsangat nin caso sa Corte na dakulang positibong resulta sa pagminimizar kan mayong pakundangan na pag-abuso sa kapalibotan.

Pigbanggit ni Camba na consideradong  hot spot sa illegal logging an Tinambac  huli sa locasyon kaini na open access kaya ralagbalasan an illegalista sa Siruma, Lagonoy asin ibang banwa sa Partido Area.

Mientrastanto, nagpagiromdom an pamayo na kinakaipohan na magkua nin permiso sa barangay asin oficina ninda an siisay man na mapalod nin kahoy maging sa sadiring laguerta o pagrurogaring ninda.

An personahes kan CENRO maevaluar kun puwede nang putolon an kahoy. Ini iyo an mga lapa na o may labot sa poon o mismong hawak na peligrosong  magrampahog asin makadanyar sa buhay o pagrurogaring.

Nagpatanid si Camba na an nagbalga posibleng masangatan nin casong qualified theft sa irarom kan Revised Penal Code katakod sa Article 309-310 kan PD 705 o Revised  Forestry Code of the Philippines na may penalidad na pagkaprisong anom hasta sampolong taon.

Dagdag man niya na pigcelebrar an World Wetland Day kan Febrero 2. Katakod kaini, nagconducir an CENRO nin information and education campaign  para sa mga estudiantes sa secondaria dapit sa kapalibotan.

An wetland iyo an kadagaan na may permanente  o agi-aging tubig na may nag-eexister nin bio-diversity na estado. Ini pailihan kan sira, gamgam asin ibang hayop asin nagtatabang sa pagrayo sa baha. Siring man, nagsasagom kan mga ati pasiring sa dagat. 

Nangapodan si Camba para sa bilog na suporta sa pagmaigot ninda sa pagsustenir kan kapalibotan. Pig-admiter niya na kaipo an pagmakulog kan gabos mantang mismong buhay kan tawo an nadadanyaran huli kan kapabayaan asin pag-abuso sa recursos naturales na biyaya kan Kaglalang.

Sa presente, apwera sa campanya contra illegal logging, an CENRO actibo man sa libreng pagtitulo nin daga, reforestation project, pagtao nin kahoy na pangtanom, pakikipagtabangan sa mga LGU sa solid waste management, coastal clean up drive asin iba pang katarakod na actividad.