Buhay Sa Boarding House

Dai nanggad malikayan ni Announcer Rene Orillosa kan Radyo Kafuerte ang mapaturo an luha kun saiyang nagigiromdoman ang maogmang buhay sa Boarding House sa Naga. Iyo ini an mga pig dadagusan kan mga estudyante na mayong harong sa Naga ta sinda hale pa sa man iba ibang banwaan sa Camarines Sur asin sa ibang provincia kan Bicol. Sigun ki Rene, ibang iba kaidto ang saindang buhay na nagtapos sa pag escuela sa College na namatean ang buhay sa boarding house. Kaya kadakol kaidtong boarding house sa naga asin bed space ta ang Naga City iyo ang pinaka centro nin edukasyon sa Region 5. Bakong arog ngonian na igua na nin mga pampubliko asin private high schools asin colleges sa luwas kan Naga. Kaidto an mga bistadong familya sa mga provincia kan Camarines Norte, Catanduanes, Legazpi,Sorsogon asin Burias iguang mga aki na pinapadagos sa mga boarding house ta digdi nag eescuela, alagad ngonian na mga panahon, dai na kaipuhan na magpasiring pa sa Naga ta kadakol na nin mga escuelahan sa mga banwaan asin ibang provincia.

An kagayonan kan buhay sa boarding house tunay na namatean kan mga daraga asin Soltero ta duman sinda nagkaka mirinootan asin ang iba dagos nang nagkaka inaragoman. An sarong dakulang boarding house, igua nin para sa female asin male students kaya tunay na maogma ang saindang pagmati ta nahihiling ang saindang mga kras. An mga boarding house kaidto sa Naga, makukua harani sa mga escuelahan. An mga barangay na gulping boarding house iyo an Penafrancia ta sa mga interior kadakol nin boarding house asin bed space ta sinda nag enrol sa mga escuelahan kan CSNHS, Naga College, Trade School, asin Colegio de Sta. Isabel. Kadakol boarding house sa dating kalye supot na ngonian inaapod na Sto. Nino , igua man mga boarding house sa Bagumbayan, P. Santos asin mas dakul kaini sa Ateneo Avenue. An kadaklan sa mga estudyante sa University of Nueva Caceres, nakawarak sa mga boarding house kan Bayawas, Paraiso, Santa Cruz, Bagong Lipunan, Arana, Igualdad asin mas dakul an yaon sa P. Diaz na iyo an nakatudan na dagusan kan mga taga Garchitorena asin Caramoan.

Si SM Ron Enon kan OK FM, dai nanggad malilingaw sa maogmahon niyang buhay sa boarding house nindang mga taga Lagonoy na an pinag dadagusan iyo ang lumang boarding house sa kataid kan Jumel Learning Center sa Jacob Street harani sa Naga Central School. Sigun ki Rene asin SM Ron, kaya maogmahon sa boarding house ta ang mga girls garong mga artista ang kagayonan ta sinda mga joven pa, payat pa sinda, mayo pa nin mga pligis an lalawgon asin mayo pa nin mga bilbil an parte kan bituka, asin magayonon sinda sa sulot nindang school uniform. Kaya sindang mga taga Lagonoy asin Siruma, pinag lalangkagan kan saindang mga magurang ta haros pa sana dai na magpuruli sa saindang mga baryo ta sinisiraman kan buhay sa boarding house. Sinabi ni Rene na dai nanggad niya malilingawan ang excitement sa buhay kan mga estudyante kan saiyang kapanahonan ta sa aldao nin Sabado, sindang mga mag sweetheart, nag papasiring sa mga sinehan ni Bichara na an balon toasted peanut na binakal sa Plaza Rizal asin puede sir saro iyan sa rason kaya mas ginugusto ni Rene an magpalipas na may pugol nin bote nin marka demonyo ta dai niya makontrol ang sadiri na giromdomon si mga kagayonan kaidto sa boarding house. Haros gabos na naging estudyante sa Naga, iguang maogmang experiencia sa boarding house ta iyo iyan an mga harong na saindang pig papasyaran ta sa saindang pag pasiring sa boarding house, naka abang na ang sarong magayon na estudyante na napapalukso sa kaogmahan ta nagbisita an inaapod na Atabs.