Apat gadan sa NPA sa engkwentro sa Ragay, CSur

Nagkaigua nin engkwentro nin duwang veces an tropa kan militar asin pigtutubodan na grupo kan rebeldeng New People’s Army (NPA) sa Barangay Apale, Ragay, Camarines Sur kan Domingo, Mayo 3, 2026.

Sa pinaluwas na report kan 9th Infantry Division kan Philippine Army na may base sa Camp Elias Angeles, Pili, Camarines Sur an saindang tropa, 81st Infantry Battalion nasagopa an maabot sa sampolong armadong NPA asin apat an pinaluwas na binawian nin buhay sa lado kan mga rebelde mantang dai paman pinapaluwas an saindang mga pangaran o mga alias.

Nagkaperang minutos an pabalyohan nin putok na nagpoon mga 1:20 nin hapon sagcod na nag-atras an rebeldeng grupo sa man-iba iba pang direksyon.

Alagad tolos naglansar nin hot pursuit operation mga alas 4:00 nin hapon sa kaparehong aldaw asin naabotan an grupo sagcod nagkaigua liwat sinda nin pabalyohan nin putok.

Sa pinakahuring report mayo man nin nalugadan o binawian nin buhay sa lado kan tropa kan gobierno.