Andaya Highway gigibohan bagong desinyo - Sec Dizon
- Jan 24
- 2 min read
Pinapapundo sa DPWH Bicol ni Secretary Vivencio ‘‘Vince’’ B. Dizon an mga ginigibong tapal-tapal sa mga raraot nang porsyon kan Andaya Highway sa tahaw kan plano na magkua nin mga expertong Japanese Consultants nganing gibohan nin tamang desinsyo asin solusyon an highway para taposon na an haloy nang problema kan mga motorista asin mga viajero.
Ini an pahayag ni Dizon sa miembros kan media kasunod kan saiyang inspeksyon sa Maharlika Highway poon sa provincia kan Quezon sagcod digidi sa Bicol kan Enero 16, 2026.
An directiva ni Presidente Ferdinand Marcos Jr. bako sanang si mga raraot na porsyon kan highway kabale na si winalat na danyos ni bagyong Kristine envez gibohon an tamang solusyon asin tamang desinyo nganing matapos na an aroaldaw na perwesyo sa mga biyahero.
An opisyal kan DPWH bako lang kinaulay an mga engineers kan DPWH Bicol kabale an destino sa first and second engineering district kan Camarines Sur alagad kabale na an mga ordinaryong namamanuan asin opisyales de barangay na aroaldaw na nakakamati kan kadificilan sa viaje. Iguang nag-osip sa saiya na si dating viaje ninda haling Lupi inaabot sana nin labing sarong oras alagad sobra na sa tolong oras sundo sa Ciudad nin Naga.
Sa paagi nin road trip kaibanan an miembros media asin NGO an saiyang inspeksyon asin huli kaini siya mismo an nakamate kan perwisyo sa viaje na namamatian kan pasajeros haling Manila na nagpapasiring sa Naga sagcod sa Visayas.
Naheling niya an mga labot-labot asin mga lobak-lobak na tinampo na nagpapaabala sa oras kan viaje mantang namatian niya an abalang bulos nin trafico sa Barangay Cabutagan asin Barangay Tapi, sa banwaan nin Lupi, Camarines Sur sakop kan premir distrito kan provincia.
Sinabi na igua nang tagamang P16-B hale sa savings kan saindang ahencia kan 2025 asin dugang na maabot pa sa P20-B na fundo ngunian na taon.
An problema sa Maharlika Highway mga 30 anyos na na ngunian piglalaoman mangyayari sa pangako ni Dizon matapos kan saiyang road trip asin personal na inspeksyon mala ngani inabot pa nin banggui.
Si Dizon nagbaba sa lindiros kan Tagkawayan, Quezon asin Del Gallego, Camarines Sur na sinabat ninda Governador Noel Rosal kan Albay asin RDC Chairman sa Bicol, Congressman Nelson Legacion kan tercer distrito kan Camarines Sur asin Alcalde Tom Bocago kan Sipocot. Si Legacion iyo an nagdara kan isyu sa mga raraot nang Andaya Highway sa premir asin segundo distrito kan Camarines Sur sa paagi kan saiyang privilege hour sa Camara de representante.
An secretaryo nakihampangan pa ki Governador LRay Villafuerte, Cong. Migz Villafuerte kan 4th district, Cong. Hori Horibata kan first district asin Cong Luigi Villafuerte kan 2nd district. Nagpasalamat man si Gob. LRay sa pagbisita ni Dizon huli ta naheling an kamugtakan kan tinampo asin planong mag-panday nin tamang desinyo para sa concretong tinampo asin solusyon.
Comments